भूमध्यसागरमा विस्फोटपछि मालवाहक जहाज डुब्यो, दुई जना बेपत्ता : रुस

रूसी राज्यको स्वामित्वमा रहेको कार्गो जहाज भूमध्यसागरको अन्तर्राष्ट्रिय पानीमा डुबेपछि दुई जना चालक दलका सदस्य बेपत्ता भएको रुसको विदेश मन्त्रालयले मङ्गलबार टेलिग्राममा जनाएको छ ।

उर्सा मेजर ‘इन्जिन कक्षमा भएको विस्फोटपछि’ डुबेको मन्त्रालयको क्राइसिस युनिटले जनाएको छ । मन्त्रालयले १६ जना रुसी चालक दल सदस्यमध्ये १४ जनाको उद्धार गरेर स्पेनको कार्टाजेना बन्दरगाहमा लगिएको र दुई जना बेपत्ता रहेको जनाएको छ ।

स्पेनको समुद्री उद्धार सेवाले विज्ञप्तिमा जनाएअनुसार जहाजले सोमबार बिहान दक्षिणपूर्वी स्पेनको तटीय क्षेत्रमा खराब मौसममा रहँदा सङ्कट सन्देश पठाएको थियो । जसमा जहाज एकातिर ढल्किएको र लाइफबोट छोडिएको जनाइएको थियो । सेवाका अनुसार स्पेनले हेलिकप्टर र उद्धार नौकाहरू पठाएर बाँचेकाहरूलाई बन्दरगाहमा ल्याएको थियो ।

त्यहाँ रेडक्रसले उनीहरूलाई सहयोग गरेको थियो । त्यसपछि एउटा रुसी युद्धपोत आइपुग्यो र जहाज स्पेनिस र अल्जेरियाको पानीको बीचमा भएकाले उद्धार कार्यको जिम्मा लियो, त्यसपछि उर्सा मेजर रातभरमा डुबेको थियो । ‘बचेका व्यक्तिहरूको विवरणअनुसार मालवाहक जहाजले होल्डमा खाली कन्टेनर र डेकमा दुईवटा क्रेन बोकेको थियो’, स्पेनिस उद्धार सेवाले भन्यो ।

रुसी विदेश मन्त्रालयले जहाज रक्षा मन्त्रालयअन्तर्गतको नागरिक यातायात र लजिस्टिक्स सेवा प्रदायक ओबोरोनोलजिस्टिकाको सहायक कम्पनीको स्वामित्वमा रहेको जनाएको छ । ओबोरोनोलोजिस्टिकाको वेबसाइटमा रहेको नक्शाले कम्पनीले अन्य कुराहरूका साथै दक्षिणी रुसको नोभोरोसिस्कबाट सिरियामा रहेको रुसको नौसेना आधार टार्टससम्मको मार्ग समेटेको देखाउँछ ।

युक्रेनको जियुआर सैन्य गुप्तचरले सोमबार भनेको थियो, ‘रुसले आफ्ना केही हतियार र उपकरण टार्टस बन्दरगाहबाट लिबियामा समुद्री मार्गबाट ढुवानी गर्न थालेको छ ।’ मस्कोका सहयोगी बशर अल–असदलाई हटाइएपछि सिरियामा रुसी अड्डाहरूको भविष्यबारे अनिश्चितता छ । मरिनट्राफिक डट कममा सूचीकृत उर्सा मेजर १२४.७ मिटर (४०९ फिट) लामो सामान्य मालवाहक जहाज हो ।

यो रुसी शहर सेन्ट पिटर्सबर्गबाट रुसको सुदूर पूर्वी शहर भ्लाडिभोस्टकतर्फ जाँदै थियो । गत हप्ता ओबोरोनोलोजिस्टिकाले बन्दरगाहमा रहेको जहाजको तस्वीरहरूसहित एक प्रेस विज्ञप्ति जारी गर्दै यसले विशेष गरी ठूलो र भारी सामान ढुवानी गर्ने उल्लेख गरेको थियो । प्रत्येक ३८० टन तौल भएका क्रेनहरू र प्रत्येक ४५ टन तौल भएका आइसब्रेकरका ह्याच कभरहरू सुदूर पूर्वी रुसी शहर भ्लादिभोस्टकमा लैजाने भनिएको थियो ।

यसले यो आर्कटिक हुँदै बन्दरगाह र उत्तरी समुद्री मार्गको विकास गर्ने ‘राज्य’ प्रयासको हिस्सा भएको बताएको छ । कम्पनीका अनुसार यस्तो ठूलो उपकरणका लागि समुद्री मार्ग सबैभन्दा राम्रो हो र कम्पनीसँग यसमा ‘ठूलो अनुभव’ छ।

एजेन्टस्त्भो अनुसन्धानात्मक समाचार साइटका अनुसार ह्याच कभरहरू उत्तरी समुद्री मार्गमा बाक्लो बरफ फुटाउन डिजाइन गरिएको लिडर नामक नयाँ आणविक आइसब्रेकरका लागि थिए ।

एजेन्सी